सिन्ताङ । खोटाङको चिसापानी बजारदेखि सिन्ताङ– मौवाबोटे हुँदै छिमेकी जिल्ला उदयपुरको सीमा क्षेत्र वंशिला घाटसम्म बस सेवा सुरु भएको छ । शुक्रबार सो सडक खण्डमा ठूलो सिट क्षमताको यात्रुवाहक बस संचालनमा ल्याइएको हो ।

स्थानीय राजेश राजेश बञ्जाराका अनुसार बंशिला– मौवाबोटे हुँदै दिप्लुङ– चिसापानीसम्म परीक्षण गरिएको थियो । भर्खरै संचालनमा आएको बसले खोटाङबजार हुँदै सावाखेला पार गरेर आउने यात्रुहरुलाई खुटाबगैंचासम्म सेवा दिनेछ ।

यसअघि धाप्लाङ– सिन्ताङ, बराहपोखरी– सिन्ताङ, बंशिला– सिन्ताङ र चिसापानी– सिन्ताङसम्म चार पांग्रे सवारीसाधन (बोलेरो) संचालन हुँदै आएको छ । यात्रुको चाँपलाई ध्यानमा राख्दै बस संचालनमा आएको हो ।

‘रोयल खोटाङ यातायात’ बस सेवाले जन्तेढुंगा गाउँपालिकाको खुटाबगैंचा, चिसापानी, दिप्लुङ, छुप्लुङ, ओदाले, साउने, सिन्ताङ, दाप्सा, याक्सा, स्याङसीला, डाँडागाउँ, इमीखिम, देविस्थान, बंशिलालगायत दर्जनौ गाउँका सर्वसाधरण प्रत्यक्ष लाभाम्वित हुनेछन् । सिन्ताङलाई धाप्लाङ चिसापानी, बंशिला– चिसापानी र बराहपोखरीदेखि छुट्ने यातायातको लागि मुख्य केन्द्रको रुपमा मानिन्छ ।